16 OLATZ

Ordu luzez norantza jakinik gabe gidatu ostean Olatzek autoa amildegi baten alboan gelditzen du. Autotik jeitsi, jantziei zimurrak kendu eta zigarro bat ahoratzen du. Paisaiari so gelditzen da sakeletik metxeroa ateratzen duen bitartean, olatuen orroeak entzunez. Amildegian behera itsasoak indar osoz jotzen du harkaitza eta haize korronteek ur tanta niminoak altxatzen dituzte, dantza ikustezinean, jira eta bira.

"Zer egingo dut orain? Nora joko dut? Etxetik alde egin dut, eta ez dakit ondo zergaitik. Bertan, geldi, negarrez, Anderren gorpuari so geratu banintz hobe. Baino honek ez du itzulerarik. Nebari autoa lapurtu diot. Krimenaren eskenatokitik alde egin dut."

Zigarroa piztu eta goroldio apur bat duen harri batean esertzen da.

"Badakite han egon nintzela. Mirenek egurra zati zorrotz hura eskuan nuela ikusi ninduen. Anderren odolaz blai. Hanka egiten. Mirenen begietan errudun garbia: erruduna."

Zigarroari kalada sakon bat eman eta negarrez hasten da. Malkoak masailean behera erortzen zaizkio, baino jada ez diote makilajea zapuzten. Ordu batzu lehenago askatutako malkoek nahikoa zabaldu dute rimmela bere bisaiean.

"Eta ziur urdanga horri han nengoela kontatzeko denbora falta izan zaiola. Ikastolan beti izan zen ahozabala: berritsua. Ez zuen kontu bat bera ere gordetzen, denaren berri eman behar. Beraz, nire bila arituko dira dagoeneko. Nire nebaren autoaren bila agian. Urrun joan behar dut, ideiak zertxobait argitzera. Aurkituko ez nauten toki batetara. Badakit."

Kea biriketatik askatu eta mugimendu azkar batez zigarrokina amildegian behera askatzen du. Jeiki eta autoaren atzekaldera hurbiltzen da. Bertatik bizkarzorroa hartu eta biluzten hasten da. Lehenik eta behin oinetakoak. Ondoren minigona kentzen du. Odol aztarna nabariak ditu. Berokia eta kamiseta hurrengo. Tanga eta titizorroak ere soinetik kentzen ditu, eta biluzik, pila bat osatzen du janzki guztiekin.

Ilargiaren argipean Olatzen forma ederrek errainua egiten dute lurrean, bizkarzorrotik ateratako jantziak jazten dituen bitartean.

Janztez bukatzean, autora hurbildu, kontaktuari eman eta kotxearen pizgailu elektrikoari eragiten dio. Klik. Pizgailua berotzean, klik, atzera itzultzen da. Pizgailua hartu eta jantzi multzora botatzen du.

Tanga da lehena su hartzen.

Autoan sartu, kontaktuari eragin eta motor hotsean murgilduta urruntzen da Olatz.